Հայաստան` Հռոմի Պապի այցելութեան առիթով նամականիշ պիտի թողարկէ

Հայաստանի մէջ Հռոմի պապի պատմական այցելութեան առիթով պիտի թողարկուին նամականիշեր: Այս մասին, ըստ Armenpress.am-ի, յայտնած է ՀՀ փոխադրամիջոցի ու կապի նախարարի տեղակալ Գագիկ Թադեւոսեանը:

Անոր խօսքով` արդէն մշակուած ու ներկայացուած են նամականիշներ թողարկելու ՀՀ արդարադատութեան, փոխադրամիջոցի ու կապի նախարարութիւններու հրամանագիրները, կայ նաեւ Հայ Առաքելական եկեղեցւոյ առաջնորդի` կաթողիկոսի հաւանութիւնը: «Նամականիշների թողարկումներ արդէն արուել են Ռիոյ Դէ Ժանեյրոյի օլիմպիական խաղերի, Ֆուտբոլի Եւրոպայի առաջնութեան կապակցութեամբ եւ այսպէս շարունակ: Հայաստանի Հանրապետութեան 25-ամեակի առիթով, կարծում եմ, կը լինի նամականիշի, գեղաթերթիկի ու ծրարի մարում: Նկարիչներն արդէն աշխատում են»,- տեղեկացուցած է փոխանախարարը:

Անոր խօսքով` Փոխադրամիջոցի եւ կապի նախարարութեան մօտ նախարարին կից կը գործէ Նամականիշներու գեղարուեստական խորհուրդ, ուր ընդգրկուած հանրաճանաչ մտաւորականներն ալ կը հաստատեն իւրաքանչիւր տարի թողարկուող նամականիշներու, գեղաթերթիկով նամականիշներու, բացիկներու, ծրարներու ցանկը: «Նրանք մեծ ուշադրութիւն են դարձնում դիզայնին, բովանդակութեանը, որպէսզի դրանք արժանի լինեն Հայոց պատմութեանը, Հայաստանը ներկայացնեն մշակութային, պատմական, գիտական, սպորտի ու բոլոր ոլորտներում»,- աւելցուցած է պաշտօնեան:

Յիշեցնենք, որ Հռոմի Ֆրանչիսկոս Պապի այցելութիւնը Հայաստան կը նախատեսուի Յունիս 24-26-ին: